Mat 16 | NdeIBE | STEP | AbaFarisi labaSadusi beza kuJesu bamdinga ngokumcela ukuthi abatshengise isibonakaliso esivela ezulwini.

Matthew 16

Kufunwa Isibonakaliso

1 AbaFarisi labaSadusi beza kuJesu bamdinga ngokumcela ukuthi abatshengise isibonakaliso esivela ezulwini.

2 Waphendula wathi, “Nxa kufika ukuhlwa lithi, ‘Umkhathi uzaba muhle ngoba isibhakabhaka sibomvu,’

3 ekuseni lithi, ‘Lamuhla kuzaqubuka isiphepho ngokuba isibhakabhaka sibomvu, sigubuzele.’ Liyakwazi ukuchaza izibonakaliso zezikhathi.

4 Isizukulwana esixhwalileyo lesiphangayo sifuna isibonakaliso esingummangaliso, kodwa kasikho esizasiphiwa lesosizukulwana ngaphandle kwesibonakaliso sikaJona.” UJesu wasebatshiya wazihambela.

Imvubelo YabaFarisi LabaSadusi

5 Bathi sebekhuphukele ngaphetsheya kwechibi, abafundi babekhohliwe ukuza lesinkwa. 6 UJesu wathi kubo, “Nanzelelani. Liqaphele imvubelo yabaFarisi labaSadusi.”

7 Bakhulumisana ngalokhu bathi, “Kungenxa yokuba kasizanga lesinkwa.”

8 UJesu wakwazi abakukhulumayo wasebuza wathi, “Lina elilokholo oluncinyane, likhulumisanelani ngokuba lesinkwa na?

9 Lilokhu lingezwisisi yini? Kalikhumbuli na izinkwa ezinhlanu ezabantu abayizinkulungwane ezinhlanu, lokuthi laqoqa izitsha ezingaki? 10 Kumbe izinkwa eziyisikhombisa ezabantu abayizinkulungwane ezine lokuthi laqoqa izitsha ezigcweleyo ezingaki? 11 Kungani lingezwisisi ukuthi bengingakhulumi lani ngesinkwa? Kodwa qaphelani imvubelo yabaFarisi labaSadusi.” 12 Basebezwisisa ukuthi wayengabatsheli ukuqaphela imvubelo esetshenziswa esinkweni, kodwa ukunanzelela imfundiso yabaFarisi labaSadusi.

Ubufakazi BukaPhethro NgoKhristu

13 Kwathi uJesu esefike emmangweni waseKhesariya Filiphi wabuza abafundi bakhe wathi, “Abantu bathi iNdodana yoMuntu ingubani na?”

14 Baphendula bathi, “Abanye bathi nguJohane uMbhaphathizi; abanye bathi ngu-Elija; abanye njalo bathi nguJeremiya loba omunye nje wabaphrofethi.”

15 “Lina-ke?” wababuza. “Lithi ngingubani?”

16 Waphendula uSimoni Phethro wathi, “UnguKhristu iNdodana kaNkulunkulu ophilayo.”

17 UJesu waphendula wathi, “Ubusisiwe wena, Simoni, ndodana kaJona, ngokuba lokhu kawukwembulelwanga ngumuntu kodwa nguBaba osezulwini. 18 Yikho ngiyakutshela ukuthi unguPhethro, njalo phezu kwalelidwala ngizakwakha ibandla lami, futhi amasango aseHadesi akayikulahlula. 19 Ngizakupha amakhiye ombuso wasezulwini; loba kuyini okubophayo emhlabeni kuzabotshwa ezulwini, njalo loba kuyini okuthukululayo emhlabeni kuzathukululwa ezulwini.”

20 Waseqonqosela abafundi bakhe ukuba bangatsheli muntu ukuthi wayengu-Khristu.

UJesu Ufanisa Ngokufa Kwakhe

21 Kusukela ngalesosikhathi uJesu waqalisa ukuchazela abafundi bakhe ukuthi wayemele aye eJerusalema ayehlupheka ngezinto ezinengi ezandleni zabadala, abaphristi abakhulu labafundisi bomthetho, njalo lokuthi wayemele abulawe kuthi ngelanga lesithathu avuswe aphile.

22 UPhethro wamdonsela eceleni waqalisa ukumsola. Wathi, “Ngeke kwenzeke, Nkosi! Lokhu kakusoze kwafa kwenzeka kuwe!”

23 UJesu waphendula wathi kuPhethro, “Sukela emva kwami, Sathane! Uyisikhubekiso kimi; engqondweni yakho kawulazo izinto zikaNkulunkulu, kodwa ucabanga ezabantu.”

24 UJesu wasesithi kubafundi bakhe, “Nxa ekhona ofuna ukungilandela, kazidele athathe isiphambano sakhe angilandele. 25 Ngokuba lowo ofuna ukusindisa ukuphila kwakhe kuzamlahlekela, kodwa lowo olahlekelwa yikuphila kwakhe ngenxa yami uzakuzuza.

26 Kuzamsiza ngani umuntu uma ezuza wonke umhlaba, kodwa alahlekelwe ngumphefumulo wakhe na? 27 Phela iNdodana yoMuntu izakuza ngobukhosi bukaYise kanye lezingilosi zakhe, ibisivuza umuntu ngamunye mayelana lalokho akwenzileyo. 28 Ngilitshela iqiniso, abanye abemiyo khonapha kabayikukuzwa ukufa bengakayiboni iNdodana yoMuntu isiza embusweni wayo.”